أم زهير لأبو صالح: حاج بقا طرش حكي عـ”تاج راسنا”
كتبت أم زهير:
“لا صباح الخير ولا بلوط يا ابو زهير. انو أنا أم زهير بعرف من جارتنا أم خالد انك عم تشتغل دهان بويا بمحل اسمه أساس. لك وحياة عيونك ما صدقت انك عم تطرش حكي عن تاج راسك وتاج راسنا كلنا.. ما صدقت بس أم خالد حلفتلي عا اولادها وقالتلي كل الحي صارو عرفانين ومستغربين كيف إنا أم زهير بعدني يا غافلة إلك الله.
ليك ابو زهير فيه كم كلمة لح قلك ياها، بعدها ما في لا كلام ولا ارغيلة بيناتنا، انو كل شغلة بهالدني الها أساس بس المحل اللي عم تطرش فيه بلا أساس.. لانو بلا وفا.. لانو عرفت انو صاحب هالدكانة هو ابو صالح ما غيرو.. ولك نسيت كيف شقلناه عالوزارة وعالنيابة وتحملنا عجرفته عالبيارتة علينا.. ولك هيدا مش من توبنا.. ما شفناه بين الناس باي يوم .. شو عمل وقت كارثة بيروت.. شو عمل وقت مصيبة طريق الجديدة.. شو عمل لحدن مننا نحن اللي يفترض أهله وناخبيه…
سماع ابو زهير بعرف انو قلبك طيب واحيانا ساذج والحاجة أمارة بالسوء.. بعرف انك معلم بويا شاطر وفيك تغير الوان البواب والحيطان تدهن الابيض أسود والاصفر إخضر بس الأساس ما الو الا لون واحد هو الأزرق.. فاذا معلمك تفركش برماد سيكاره فأنت ما تخلي دخان السيكار يعمي قلبك وتجرصني بالحي”.