للموت ٣… راجع؟

كتبت جوزفين حبشي:

بما انو الزمن زمن انتخابات ولوائح واصوات تفضيلية، حبيت اعمل انتخابات فنية، وادعم لائحة” للموت2″ (لأنو المسلسل بيمثّل كل شي انا بتمنى شوفو بالدراما اللبنانية).

اللائحة تشكّلت قبل عرض الحلقة الاخيرة، وتضمّنت ٤ خيارات تفضيلية حول مين رح يموت من “الترويكا”( سحر وريم وعمر). وبنهاية التصويت بعد عرض الحلقة، تبيّن التالي:

الشعب يريد جزء ثالث.
الشعب يريد جزء ثالث.
الشعب يريد جزء ثالث.
ونحنا بلبنان معوّدين على شعار راجع. هالشعار انا كنت ضدو وضد اللي كان ينكتبلو انو راجع، بس شعار “للموت راجع” ايه والله والله كل اللبنانيي بيتوحدوا بالمطالبة فيه. ومش بس اللبنانيي، والعرب كمان.
“للموت” راجع… لازم يرجع لأنو بيحمل يرجع وبيستاهل يرجع، ولأنو نهاية ريا وسكينة، وتلما اند لويز، وسحر وريم مفتوحة، ولأنو نادين جابر شاطرة وما بينخاف عليها تخترع بعد احداث اقوى واعنف واهضم، ولأنو شغل وابداع فيليب اسمر السينمائي الادوات ما بينشبع منو، ولانو الشخصيات مدهشين، ولأنو اداء الممثلين عالمي، ولأنو شفيق لازم ينتقم، وسارية الغزالة الرايقة كمان لازم ترجّع “الرزك” من زلاعيمو للـ “دوشاش” أمين، وتنغرم بشي ابو الزوز جديد، ولأنو كتير رح نتسلى بالحبس بالمعركة بين الزعيمة ليليان نمري وحبيبو روزي الخولي، ولأنو عبدالله ممكن يفكر انو أم محمود هي حنان ويشك عليها، ولانو هادي ابتسم هو وعم بيقول للبحر اللي زتت ريم حالا فيه: “صرلي ٤٠٠ يوم ما قلتلك انو بحبك”. هانت يا هادي،لازم تنطر لرمضان الجاي، والله يصبرك ويصبرنا.
كلنا ناطرين يرجع “للموت” وترجع سحر وريم، بس للاسف عمر وحدو مستحيل يرجع. رح نشتقلك ونشتاق لاداءك الرائع باسم مغنيّة.

الف مبروك نجاح المسلسل يا “ايغل فيلمز”. وهيدا المستوى اللي طول عمرنا منحلم فيه لأعمالنا اللبنانية.